مشوار الإمتحان (سيناريو صوتي)

مشوار الإمتحانات (سيناريو صوتي)

كتبته: 10/01/2011

تم تسجيله في ملف صوتي و إذاعته في تلك الأثناء
 

امتحاني بكرة

ببساطة شديدة ..... الإمتحان بكرة ..... و إيه يعني ؟؟؟ السؤال دلوقتي : زاكرت ؟؟ لا ... كل ما كنت بقول بكرة حذاكر أجي مذاكرش و دلوقتي الإمتحان بكرة .........

أحييييييييه أحييييييييييه مذاكرتش من الأول ليييييييييييه ؟؟
(أنا إسكندراني علي فكرة)

رفعت الشعار ده ف البيت ف أكيد مش  حيعدي ع علتي حبيبتي ببساطة بداية

الأم : يا نهاااااااااااري مذاكرتش ... ما انا عمالة أقلك طول السنة إنك تذاكر ومفيييش استجابة أمااال كنت قاعد طول السنة بتعمل اييييييييييه ؟؟ يا منيييل  علي عينك ..... حتسقطلي و تعيد السنة . ولا إيه ؟؟؟؟؟ اييييه
أنا : يا ماما براحة بدل ما تشجعيني إني أدخل الم المنهج ؟؟
الأم : تلم ايه ؟؟؟ هو المنهج بيتلم ف يوم و ليييييله يا منيل ؟
أنا : طب خلاص الكلام ده مش وقته دلوقتي  . طب استني لما تطلع النتيجة وبعد كده اتكلمي براحتك
الأم : انتا حتعلمني اتكلم امتا كماان ... يلا اتنيل ادخل ذاكر لما نشوف حتهبب ايه
أنا : حاضر يا ماما تأمري يا حبيبتي ......(وانا ماشي للأوضه): ياااااارب سهل

بالنسبة للبابا حبيبي  الحقيقة الراجل لا غبار عليه بيدفع و يستني النتيجة مبيضيعش وقته في مهرتلات (او مترللات مش عارف بالظبط) الراجل ظبطني ... دخل عليا بعد ما دخلت الأوضه بنصف دقيقة بالظبط و تقريبا كان لسه قايم من النوم علي صوت ماما

بابا : ايه اللي ممتك بتقوله ده يابني ؟؟؟ لسه كل ده مذاكرتش ؟؟
انا : ما انتا عارف يا بابا إن أنا كنت مشغول أوي الفترة اللي فاتت مع صحابي و كده وبعدين متخافش انا عارف انا حعمل ايه كويس
بابا : انا أهم حاجة عندي النتيجة وإنتا عارف انا مش حرمك من حاجة
انا : طبعا يا بابا .... ربنا يخليك و متخفش مش حخيب ظنك أبدا
بابا : هو ده ابني (بنفس أسلوب الراجل اللي قلد صوت نيكولاس كيدج في النسخة المدبلجة من فييلم : آله الحرب )
انا : (ايه البلوة اللي حطيت نفسي فيها دي؟) ... يااااارب سهل

أختيييييييييييييي ....... أختاااااااااااااااه ..... الزئردة الصغيرة لسه ف كي جي 2 بس برده لازم تبدي برأيها ........ لكن فعلا فادتني ... بابا طلع من هنا لقيتها داخلة عليا الأوضه ورمت الكلمة و مشت :

أحييييييه أحيييييه مظاكرتش ملأول ليييييييه ؟؟؟؟ (وكانت ملحوسة نفسها شقلاطة)

بسم الله ما شاء الله عليها .... تربية أمي وهي شبهي علي فكرة و حبة بتقلب علي منة شلبي (اختي مش أنا) ..... المهم بعد الكام كلمة دول أكييد نفسي اتفتحت ع المذاكرة ...... ونمت !


يوم الإمتحان

نمتلي ساعة وصحيت لميت حبة من المنهج و رحت الكلية

دخلت اللجنة و قعدت ف مكاني و اتفقت مع صاحبي حبقي اخبط ع الديسك مرتين يبصلي لو مرة واحدة ميبصش يبقي انا بستهبل عشان محدش ياخد باله (زكي اوي صح ؟ )

المهم الراجل سلم الورقة من هنا ... ابص ف الورقة ..... ابيض ... الورقة بيضةةةةة .... معرفش كلمة واحدة ... ده امتحان ايه ده  يا مرسي ؟ ...
المراقب : ركز في ورقتك و بلاش كلام كتييير شكلك بتاع مشاكل .... حراقبك ... وجه قعد جامبي في المدرج ... وعينك ما تشوف اللا النور ........ ساب اللجنة كلها بتغش و جه قعد جمبي ... بلط (بتشديد اللام)

"هي هي هي ..... العب ... اموووت انا يا حبي......."
المراقب : ما تقفل يابني الموبايل ده ولا اسحبه منك ؟؟؟؟
انا : لا ياعم علي ايه ...؟ ... حقفله احسن

(يااااااااااااااااارب)
طب طب
صاحبي يعمل نفسه مش واخد باله
طب طب
يبص براحة
المراقب : بص ادامك يابني ركز في ورقتك و لا اعملك محضر ؟؟؟
مرسي : محضر ليه يا عم احنا في قسم ؟؟؟؟ خلاص حبص ادامي .. حسبي الله و نعم الوكيل
انا  : وكمان بتحسبن ... مش كفاية إن انا مش عارف حاجة ..
مدير قسم الحبانية : ركز في ورقتك
انا : حاضر يا عم الحج خلاص مركز اهه


ترررررن ترررررررن

بابا يفتح الباب : ايه جبت النتيجة ؟؟
انا : محجوبة يا بابا لسه الاسبوع الجاي
بابا : يابني ما مرسي كلمني و قاللي انها طلعت
انا : يابابا المكان زحمة ف قلت اروح وحروح بكرة


ترررررررررن تررررررررن

ماما : عملت ايه ؟
انا : جبت ضعيف جدا يا ماما من الآخر كده
ماما : يالهووووووووووي ينيلك يا مهبب
انا : ايوا يا ماما حعيد السنة عاجبك كده ؟؟
ماما : انا عارفة ان حظي هباب انا عارفة ان انتا ................. (والبس بقي يا معلم كلام من اللي قلبك يحبه)

ييجي الحج وبرضه يصحي من النوم ع صوت امي حبيبتي ....... يروح رازعني واحد قلم (ألم يعني ) علي وشي وكلمتين من اللي قلبك يحبهم برده

اختي الصغيرة حبيبة قلبي تيجي طبعا تقول كلمتها بعد ما البيت كله سكت و هدي ف من الطبيعي انها تشعلل الموضوع تاني ...... فل أوي و الشكولاطة  برده ملحوسة نفسها بيها

"ياخربيطك ....... صقطت ؟؟؟ لييه بص ؟؟؟ ماما قالطلي ان الرجالة مينفعش يصقطوا عشان ضول اللي حاميين المقان (قصدها المكان = المجتمع يعني ) .. إخص علييييييييق"

اسكني ... أصل انا ناقصك يا بعيدة ... نفسي اعرف بتجيب الحروف دي منين مش عارف
وهاتك يا زعيييييييييييييييييق طول الصيف لحد امتحانات السنة اللي بعدها .......


محمود سامي محمود
10 -01 – 2011
الإثنين