وأنا مال تيييييت؟ (سيناريو صوتي)

وانا مال تيت ؟ (سيناريو صوتي)

كتبته: 28/01/2013

 

حماااااااااااااادة
ايوا يا ماما
انزل جيب عيش
نعم ؟
انزل جيب عيييييييييش
يا ماما ما تبعتي للبواب يجيب
البواب مش رايح النهاردة و مفيش عيش في البيت
طب هو لازم انا ؟؟؟؟؟
ايوا مش كفاية جايبلي ضعيف جدا
ما كفاية بقي هو مش خلصنا و قلت حذاكر السنة دي؟
بقلك ايه بطل كلام كتير .... انزل جيب عيش
ما انتي عارفة يا ماما إن الأفران متنيلة علي عينها زحمة
أعملك ايه يعني مناكلش ؟؟؟ وبعدين هو مش مفروض إنك راجل ولا ايه ؟
لا راجل ..... هاتي كيسة عشان اجيب فيها العيش .... استغفر الله العظيم يا رب
ادخل جيب انتا هو انا شغالة عندك ؟؟؟
حتي دي؟؟؟ ماشي ... مش عارف انا عم عوض حبكت في دماغه ليه ميجبش؟؟؟ وبعدين هي بمزاجه؟
بطل رغي ويلا
حاااااااااااااااااااااااضر

أخدت كيسة و نزلت وبعد ما نزلت تحت خالص افتكرت اني نسيت الفلوس ف قلت ابعت عم عوض يطلع يجيب الفلوس اصل مش كل شوية اطلع و انزل و مفيش اسانسير

عم عووووووض
عم عوووووووووووووض
ايوا يا بني
ازيك يا عم عوض؟
الحمدلله يابني
بص يا عم عوض انا نسيت الفلوس فوق ينفع تطلع تجيبهالي بس ؟ عشان لسه نازل

نظرته اتغيرت ليا تماما و بصلي من فوق لتحت وراح واخد بعضه طلع جاب الفلوس ونزل ادهالي و طلع نص جنيه من جيبه و قلي
"هاتلي عشرة معاك"

ماشي يا عم عوض دلوقتي بقيت انا بجيب للبواب بتاعنا المهم رحت الفرن


مجرد اني وصلت قررت اني امشي طب ليييييييه ؟
كفاية منظر الشارع و الناس اللي فيه
6 صفوف كل صف فيه 12 واحد
كل دول علي شباك صغير جدا بيدخلوا ايديهم فيه بالعافية و الراجل بينقي علي مزاجه
بس اللي خلاني استني شوية اني تخيلت شكل امي و انا داخلها من غير عيش
" مش نافع في حاجة خالص كده؟؟ يعني مش عارف تنجح و مش عارف تجيب عيش يا منيل؟"
المهم , رحت سألت آخرواحد في صف من الصفوف و قلتله :
" انا عاوز ب اتنين جنيه اقف فين ؟"
"إسأل حد غيري يا عم"
رحت أسأل واحد تاني
" أنا عاوز ب اتنن جنيه يا معلم ... متعرفش انهي طابور؟"
"اللي إنتا كنت واقف فيه "
يا سلام يعني اللي سألته كان عارف طب ليه مرضاش يقلي؟؟؟ ما عليـــــنا ...
المهم وقفت في الطابور و استنيت ........
ساعة
ساعة و نصف
ساعتين
ساعتين
خلاص ادامي راجل واحد بس
ولكن انا عندي تعليق بسيط ع الطابور ... بسم الله ما شاء الله كله بوابين وكلهم لازقين فيك متعرفش مش بيعترفوا بحاجة اسمها ان الواحد يقف براحته لييييييييه ؟
المهم وصلت
"باتنين جنيه"
"بجنيه بس "
"بس انا واقف في طابور الاتنين جنيه"
"هي كده عاجبك عاجبك مش عاجبك .... روح "
"لا يا عم ... ماشي هات ب جنيه"

اخدت ب جنيه و جيت اطلع من الطابور اخدتلي شلوووووووووط محترم و قفا ابن ناس وطلعت بإحترامي
انتصرت

اول لما روحت قابلت البواب
" هات العشرة"
"مفيش عشرة اناجبت بجنيه بس"
" انا مش قايلك حاخد عشرة... يبقي عشرة "
" يا عم متخنقنيش ... خد فلوسك اهه"
" ماشي يا ولاد الأكابر ... بقي كده؟ "
" امشي كده يا عم روح شوف شغلك .... شغال عند ابوك انا ؟"

ترررررررررررررررررررن
" السلام عليكم "
"بابا : وعليكم السلام ..كنت فين ؟"
" كنت بجيب عيش"
"جبت بكام ؟ "
"بجنيه واحد بس عشان الفران مرضاش "
"مرضاش ليه ... انتا مش راجل ؟؟؟"
" هو دماغه كده ... اعمل ايه انا ؟"
"ماما : تيجي من بعيد : زي ما قلت مش نافع في حاجة خالص"
"يا ربي .... انتي ما بتصدقي؟؟؟"
"يلا انا عارفة حظي ... فين الباقي ؟"
"خدي "
واديتلها النصف جنيه
"ايه ده انا مدياك اتنين جنيه مع عم عوض ازاي الباقي نصف جنيه ؟"
" عم عوض ادالي جنيه ونصف و قالي خد النص جنيه ده جبلي بيه عشرة"
"ياعني عم عوض بيسرقك كمان .... يامنييييييييييييل "
" وانا مال امي انا ؟ "
"بابا : ايه مال امي دي يا ابن التييييييييييييييييت ؟؟"
"ياااااااااارب ........ انا داخل اناااااااااااااااااااااام ........ سلام عليكم"
بعديها بنص دقيقة و كالمعتاد اختي الصغيرة تيجي
" جبت عيش؟"
"اه جوه "
"ماما قالت انك اتسرقت .... احيييه احيييه انتا اهبل كده ليه ؟"
"يااااااااااااااااارب"

محمود سامي محمود
28 \ 01 \ 2011